E wātea ana anō hoki a Stats NZ signs agreement with Te Iwi o Ngātiwai to support 2023 Census i te reo Ingarihi.
Kua waitohutia e Tatauranga Aotearoa tētahi pukapuka whakaaetanga i runga i te hiahia kia whakapikingia te whāinga wāhi o te iwi o Ngātiwai i te Tai Tokerau ki Tatauranga 2023, i Whangārei, i te rā nei, e ai ki te kōrero a Tatauranga Aotearoa i tēnei rā.
I waitohutia te pukapuka whakaaetanga e Te Iwi o Ngātiwai me te Kaitatau a Te Kāwanatanga, a Mark Sowden mō Tātauranga Aotearoa i tētahi hui motuhake i tū ki Whangārei Terenga Parāoa Marae me Te Poari o Ngātiwai i te Wenerei, 7 Hakihea.
"He kokenga whakamua nui tēnei mō ngā taha e rua. Ko tā tēnei pukapuka whakaaetanga he hora atu i tā mātou whakaūnga kia tautoko mātou i a koe, kia āhei, kia whai wāhi hoki Te Iwi o Ngātiwai ki te Tatauranga 2023.
"Ehara i te mea ko te whakapakari i te whirinakitanga ki te tatauranga anake te hua o tā koutou tautoko; kāore e kore ka whakapikia te taumata whakaurunga mai o ngāi Māori i muri i tēnei whakaaetanga. Me kī, me i kore koutou kua kore mātou e kaha ki ngā mahi nei," te kī a Mark.
I mihi nui anō hoki te Heamana o Te Poari o Ngātiwai, a Aperahama Kerepeti-Edwards ki te whakaaetanga.
"Mā tēnei whakaaetanga whakawhanaunga ka horaina mai he rauemi ki Te Iwi o Ngātiwai hei ārahi i tā mātou kōkiri mō te tatauranga, hei whakatairanga i te whāinga wāhi mai me te whakakīnga pukapuka. Hei tautoko hoki tēnei whakaaetanga i te whakawhanaketanga raukaha mō te iwi i roto i te whakahaerenga me te māramatanga raraunga," e ai ki a Aperahama.
E whakaae ana a Tatauranga Aotearoa ko Te Tiriti o Waitangi te pukapuka taketake o Aotearoa me te whakaū i tō mātou piripono ki ō mātou herenga i raro i Te Tiriti o Waitangi. I te marama o Whiringa-ā-nuku 2019, nā Tatauranga Aotearoa me te Iwi Leaders Group o ngā Kaihautū o ngā Iwi o te Motu i waitohu tētahi Kirimana Hononga Mana Ōrite.
He rautaki haepapa te hora tikanga mā te Māori, mā te mahi tahi me ngāi Māori, ngā iwi, ngā hapū hoki, mā Tatauranga Aotearoa. "Kua tīmata tā mātou hoehoe tahi me ngā ngā iwi Māori me te iwi Māori nui tonu, e āhei ai koe kia whai wāhanga ki te pūnaha hauropi, hei hoa kōtui, hei hoa mahi paheko, hei kaihoahoa, hei kaiwhiriwhiri take, hei kiritaki hoki," ki tā Mark.
Ka mahi tahi te Tira Tuituinga Hapori Tatauranga ki Te Iwi o Ngātiwai ki te whakatairanga i te tatauranga ki ngā whānau mā roto i ngā rā hapori me te tuituinga ki Te Tai Tokerau, mā ngā rauemi whakatairanga i roto i te reo Māori, me ngā wāhi e kitea ai e te tangata ngā tautoko tika hei whakakī i te tatauranga.
E whakawhirinaki ana ngā iwi, ngā hapū me ngā rōpū hapori ki ngā raraunga kounga tiketike, hei whakamārama, hei whakatutuki hoki i ngā hiahia o ngā hapori puta noa i te whenua katoa.
